Skip to content

شهادة هالة فؤاد

Hala Fouad’s testimony in English

ا نا نزلت امبارح ماسبيرو حوالى الساعة 6 أو 6 و ربع. كنت فى وسط البلد و اخدت تاكسى من طلعت حرب لغاية عبد المنعم رياض قصاد رمسيس هيلتون. نزلت من التاكسى قبل ما نوصل رمسيس هيلتون علشان الطريق كان مقفول بالناس اللى ماشية فى المسيرة (اللى جاية من شبرا). أنا كنت لوحدى خالص و مشيت لحد الناس اللى فى المسيرة لغاية ما بقيت وسطهم و ابتديت اكمل معاهم. كنا قبل رمسيس هيلتون (على يميننا) و الدنيا كانت كويسة حتى أنا كلمت جوزى قلت له كله تمام أطمن و الدنيا متنظمة كويس و أنا نص ساعة و هارجع. الناس اللى أنا كنت ماشية معاها كانت ناس بسيطة جدا على كل شكل و لون ستات كبار و رجالة كبار أطفال بنات و شباب صغير. و كان الشباب عاملين كروردون حبل و حاطين البنات و الستا ت فى النص علشان الحماية و الزحمة . و لأجل الشهادة الموضوع كان منظم و مافيش زق ولا تزاحم. مشيتا و الناس ماسكين صلبان و بيهتفوا شوية يقولوا “يا رب” و شوية “كيرياليسون” و شوية ترانيم و شوية”احنا مش اقلية اهى مليونية” و شوية هتافات ضد محافظ أسوان (مش فاكراها) المهم المسيرة استمرت و عدينا هيلتون رمسيس (على يميننا) و مشينا تقريبا لغاية العمارة اللى قبل صادكو” . أنا طلعت من وسط الناس و وقفت على الرصيف اللى فى النص لسة بابص و افكر اطلع قدام عند التليفزيون اسمع اللى بيتقال على المنصات و كده. مافيش 3 دقايق و سمعت صوت ضرب نار و لقيت عربية مصغحة بتاعة الجيش ماشية الناحية التانية (ناحية النيل) بسرعة هستيرية و طلقات بتنضرب (ما اعرفش ايه) يس ضرب طالع من العربيات . مصفحة الجيش كانت ماشية سرعة جنونية زى المنظر بتاع عربية الأمن المركزى وقت الثورة ( عربية و اتنين و تلاتة) . عربيات جاية من ناحية التليفزيون فى اتجاه مطلع اكتوبر. طبعا الناس ابتدت تجرى يمين و شمال و تتفرق و أنا لقيت روحى بأتزق وسط الهرج و المرج اللى بدأ يحصل. المهم قلت أنا هاجرى ناحية العمارة و اتحامى بالحيطة كمان علشان ماقعش من الناس اللى بتجرى. فعلا عديت من الرصيف اللى فى النص و وصلت للناحية التانية. مافيش 3 دقايق و لقينا واحدة من المدرعات دى جاية ناحيتنا (يعنى من عند رمسيس هيلتون فى اتجاه التلفزيون) . الناس ابتدت تصوت و تجرى على العمارات تدخل و تحاول تتحامى بيها. بعد ما العربية المدرعة عدت الناس زقوا عربية بيضا اظن لادا فى وسط الشارع علشان يقفلوا الطريق على المدرعات لو لفت و رجعت تانى. طبعاالدنيا كانت هايصة و الناس بتجرى فى كل اتجاه و مش فاهمين ايه اللى بيحصل.أنا بعد كدة مشيت عشان أروح من جنب الهيلتون و كان جنود الأمن العسكرى مقرفصين فى الأرض بالدروع و معاهم قائد ضابط أو اتنين. المهم مشيت طوالى من تحت الكوبرى فى اتجاه النيل هيلتون و كملت لغاية قبل عمر مكرم و اخدت تاكسى و روحت. برضه لأجل الشهادة الناس اللى انا شفتها و كنت وسطيها ناس غلبانة و مكسورة و ما كانش باين عليهم التشرد ستات تخينة بتقعد على الرصيف و تقلع الجزم علشان رجليهم وجعتهم. ناس عادية جدا. ماشفتش سنج ولا عصى ولا غيره فى الحتة اللى انا كنت واقفة فيها الناس بس كانوا ماسكين صلبان. ., اتا ماشية بقى كان شوية عيال 16 ولا 17 سنة بدأوا يكسروا فى الطوب و يحدفوه على المدرعة و هى ماشية .قبل ما تلف من تحت الكوبرى و ترجع تانى . و عيليين نطوا على المدرعة و اتشعلقوا فيها و هى ماشية. و الدنيا كان منظرها هايقلب طين و اهو فعلا حصل . للأسف و انا مروحة و ماشية فى الشارع كان اول مرة فى حياتى أحس ان أنا مش فى مصر. أنا كنت لابسة صليب و ماشية تقريبا بأصوت لوحدى (بيموتوا الناس) و تعليق من التعليقات من اخ فى الشارع “معلش اصل انتوا غلطانين المرة دى


نشرت يوم 10 أكتوبر الساعة 08:33 صباحاً على صفحة الشاهدة على فيسبوك بعنوان “موقعة ماسبيرو 9/10/2011”.

اكتب تعليقُا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: