Skip to content

شهادة فرح سعفان

أنا وصلت بعد ما المدرعات دهست المتظاهرين و تم إطلاق النار بالظبط بيمكن ١٠ دقائق… كان في حالة هلع، صريخ و بكاء هستيري من السيدات و الاطفال و قابلت راجل عجوز بيبكي بحرقة و كل اللي نازل عليه “ابني مات.. داسوا على ابني” و كان في شاب بيصرخ “ضربوا بيتر.. أخويا بيتر راح” و كان في مصابين كتير شفتهم بعد ما العساكر ضربوهم كان في اصابات في الرأس و اصابات في طلق ناري كتير و ناس سايحة في دمها و مش عارفين يروحوا بيهم فين و العربيات رافضة طبعاً تقف تاخد أي من المصابين..

جثث الشهداء كانت محطوطة في عمارة أو جراج أو يمكن في الاتنين بس أنا شفت منهم اتنين.. كانوا استغفر الله العظيم مدهوسين تماماً و الملايات لونها أحمر من كتر الدم و يعني حاجة صعبة جداً الله يصبر أهلهم على ما ابتلاهم..

المتظاهرين ورولي أكثر من رصاصة من الرصاص الحي اللي اتضرب بيه المتظاهرين و أنا شفت ناس بتنزف من رجلها و بطنها بس كان في أزمة في الاسعاف من ناحية قلة العدد و خوف الاهالي على إعتقال ابنائهم داخل الإسعاف

تعليقات أغلب الاقباط كانت حالة الغضب العارم تجاه المجلس العسكري و عدم تحميل الإسلام كدين أي إتهام حتى راجل قال لي “لو انهم يقتلونا و يدهسونا و يبيدونا ده مكتوب في القرأن مش هنقول حاجة انما ده مش الإسلام.. الإسلام مش كدة” و كان في واحد بيقول “ده مش طنطاوي ده هيتلر دي عملية إبادة جماعية”

بعد فترة بدأ الجيش في الظهور تاني على كوبري أكتوبر و حدف الطوب و قنابل مسيلة للدموع على المتظاهرين.. في الاول المتظاهرين جريوا لاكن بعد ٥ دقايق اتجمعوا تاني و بدأت معركة الطوب و بدأت القنابل المسيلة للدموع بغزارة من إتجاه الكورنيش و من إتجاه الهيلتون و فجأة مدرعة تانية جريت في إتجاه المتظاهرين المتجمعين اسفل الكوبري و وقف أمامها شاب رفع علامة النصر و في أقل من ثانية جري معه شباب تانيين و وقفت المدرعة و رجعت للوراء

بعديها الغاز زاد أوي و في قنبلة وقعت أمامي فتعبت و قررت أرجع تجاه التحرير فوجئت بعربية حريق تابعة للجيش متحاصرة من المتظاهرين و تم الإعتداء على السائق لاكن أغلب المتظاهرين هتفوا لأ لأ لأ و انقذوا السائق في الاخر

بعد فترة بدأت المعركة تنتقل إلى ميدان عبد المنعم رياض و الجيش إختفى و اللي كانوا بيهاجموا المتظاهرين كانوا ناس لابسة مدني و ممكن بكل ثقة أقول بلطجية لئن كان معاهم طوب جاهز و ظهروا من الهوا و طبعاً المتظاهرين للدفاع عن النفس بدأوا يكسروا في الرصيف عشان يردوا على الإعتداء و كان في ناس تحت الكوبري و ناس فوق الكوبري بتهاجمهم و إستمر الوضع ده فترة و فجأة حصل أغرب شيء إن الناس دول اللي كانوا بهاجمونا بدأوا يهتفوا “الشعب يريد إسقاط المشير” و بعديها المتظاهرين بكل سذاجة و أنا اسفة اني بقول سذاجة بدأوا يهتفوا سلمية سلمية و الناس البلطجية بدأوا يتراجعوا ناحية ماسبيرو تاني و المتظاهرين وراهم بهتاف مسلم مسيحي أيد واحدة

رجعنا تاني جانب الهيلتون و كان في تبادل طوب ما بين الجيش و المتظاهرين يعني كان زي فخ تعبان لكن عدد المتظاهرين خلا الجيش يرجع تاني تحت ناحية مبنى ماسبيرو و قدرت أقرب لمدة ١٠ دقايق شفت كمية عسكاير جيش و أمن مركزي مش طبيعية تحت الكوبري.. في الوقت ده كنت على كوبري أكتوبر نفسه و لقيت من بعيد ٤ مدرعات أمن مركزي بيقربوا و طلع المتظاهرين يجروا عليهم و حدفهم بالطوب و بدأت المدرعات في الرجوع و محاولة الهروب لاكن واحدة منهم إتحشرت في الرصيف و المتظاهرين حاولوا يفتحوا الباب و ينزلوا العساكر لكن قدروا يهربوا بسرعة و يرجعوا تاني مطرح ما جم

رجعنا التحرير و كان هناك في إشتباك حاصل ما بين الجيش و المتظاهرين اللي كانوا قرروا الرجوع للميدان و كان في ضرب غاز مسيل للدموع أكتر من اللي في ماسبيرو و حاولنا نروح للعربية من شوارع جانبية لاكن فوجئنا بإن الجيش موجود في كل الشوارع الجانبية و مانع السيارات و الناس من المرور سواء للميدان أو للخروج بعيد.. سألت العسكري ليه يعني أنا عربيتي قريبة قالي والله مالناش دعوة إتصرفوا

فضلنا مش عارفين نعمل إيه و بعدين لقينا حارة دخلنا فيها و فضلنا نطلع في شارع ندخل في شارع لحد ما وصلنا الشارع الموازي لمحمد محمود مش فكرة إسمه إيه و كان في متظاهرين كتير متجمعين هناك و امامهم قوات جيش مهولة و مرة واحدة الجيش بدأ يضرب نار و يجري علينا و جرينا لحد قرب ميدان طلعت حرب و في الأخر الجيش رجع و تقريباً كان بيحاول يخوفنا

بعد فترة وصلت العربية الحمدلله و رجعت بيتي و ده رابط للفيديو اللي أنا صورته النهاردة VIDEO – أحداث ماسبيرو


نشرت يوم 10 أكتوبر على مدونة الشاهدة بعنوان “شهادتي عن أحداث ماسبيرو ليلة ٩ أكتوبر ٢٠١١”.

اكتب تعليقُا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: