Skip to content

شهادة أحمد مصطفى

Ahmed Mustafa’s testimony in English

في البداية : والله العظيم اللي انا هاقوله ده صحيح وشوفته بعنيا وربنا شاهد عليا

بدأت الحكاية وأنا راجع من الشبكة العربية كنت في مؤتمر صحفي عشان البحرين وانا في طريقي للجرنال قابلت زمايلي وقالوا ان فيه ضرب نار عند ماسبيرو وكانت الساعة تقريبا 7 فسبتهم يروحوا وبعدين مروة-زميلتي في الجرنال- قالتلي تعالي نروح معاهم قولتلها يلا وركبنا أتوبيس لحد المتحف المصري ونزلنا بعد ما شوفت وانا في الاتوبيس مدرعات رايحة ناحية ماسبيرو.

وانا في الطريق أول حاجة شوفتها ست متعورة وماشية وصورتها ، وبعديها بشوية لقيت واحد مصاب وواخدينه علي عربية ربع نقل ف وأنا بصوره قالولي ان فيه واحد ميت معاهم عالربية وصورته برضه بس لسه هارفع الفيديو بتاعه، سبتهم ومشيت ناحية هيلتون رمسيس من ورا ولقيت ناس كتير وناس كتير جدا مصابين وبينزفوا دم من كل ناحية ،

رحت ناحية هيلتون من ورا ولقيت الفندق مقفول وجواه مصابين وتقريبا كان فيه حد مغمي عليه أو ميت-الكلام ده شوفته من الإزاز-وده الفيديو

http://www.youtube.com/watch?v=MKHSFJyyvPw

بعديها قعدت اصور شوية في ناس مصابة لحد ما لقيت المتظاهرين ماسكين عميد شرطة تقريبا _انا مش عارف الرتبة بالظبط_ وطايحين فيه ضرب وناس خبوه جوه الفندق من بوابة جانبية وده الفيديو باللي حصل

http://www.youtube.com/watch?v=iS0wjL4FQwM

بعدين لقيت رصاص في حزام يعمله حوالي 2 متر وحاولت أجيب رصاصة منه ماعرفتش لحد ما لقيته انفرط عالأرض وجبت رصاصة تقريبا 5 سم طول

الرصاص في الفيديو http://www.youtube.com/watch?v=ofkzvlIaX2Y *

_وبعدين وقفت شوية وقررت إني أروح عند ماسبيرو فقلت لزميلتي ماتتحركش من مكانها ورحت أنا لوحدي.

قابلت نواره وانا في الطريق وقولتلها فيه ناس مصابة كتير وميته في المكان اللي انا كنت فيه وهي قالتلي ان مفيش حاجة هناك عن ماسبيرو عشان الشرطة كانت قافلة الطريق ، ولما رحت هناك لقيت مجموعة من الأقباط شايلين الصلبي وبقولوا صلوات وبصراحة كان منظر جميل جدا وصورته ودي صورته.

بعديها رجعت ناحية الفندق ولقيت وانا في الطريق ناس مصابة بتخرج من جراج في عمارة جنب هيلتون رمسيس وصورتهم كام صورة كده ، وفيه ناس كانوا متشالين علي موتوسيكل وناس في عربية جيب كانت مكسورة صاحبها تطوع انه يوصلهم المستشفي القبطي في رمسيس..

دخلت الجراج وصورت الناس وهي فيه وقالولي ان فيه ناس ميتة جوه فددخلت من دخل صغير كده لحد ما شوفت المنظر المرعب اللي انا شوفته وما قدرتش أمسك نفسي ولقيت دموعي بتنزل لوحدها..

شفت 5 ميتين وممديين علي الأرض ، الإتنين اللي كانت اصابتهم باينة كان واحد رقبته مقطوعة وواحد راسة مبططة من أثر حاجة داست عليه.وده الفيديو والخبر في البديل بإسمي

http://tinyurl.com/42vpvga

ملحوظة – الفيديو ده صعب جدا

بعدين رجعت تاني عند الفندق من ورا وقررت إني أروح قدام ماسبيرو ، ولما طلعت علي الكوبري لقيت قنابل مسيلة للدموع والأمن المركزي بيضرب نار ومش عارف بقي رصاص حي ولا فشنك وده الفيديو

* http://www.youtube.com/watch?v=T9iVPIuhRpM

بس وكانت في جيبي الرصاصة اللي اخدتها من عند الفندق وكانت رصاص حي ، وفضلت اطع الكوبري واصور لحد ما الأمن ضرب قنبل جنبنا وانا فضلت واقف وكنت لوحدي والناس بعيدة عني مسافة 20 متر كده وفي لحظة لقيت نفسي شميت كمية كبيرة جدا من الغاز ، ف كتمت نَفَسي وجريت لتحت الكوبري من غير ما أشوف أي حاجة لأن عنيا كانت مليانة دموع ومناخيري سايبة وبيحرقوني ولما وصلت لتحت الكوبري قعدت شوية لحد ما فقت بس للأمانة انا شوفت مولوتوف بيتحدف علي الأمن المركزي كانت قنلة واحدة بس اللي شوفتها وشوفت قدام شوية عند ماسبيرو تقريبا كاوتش مولع وكمية أمن وجيش غير عادية وبعدين قابلت مروة ومشينا للجرنال وكتبت الخبر ونزلت الفيديو المهم والصور اللي موجوده في الجرنال كلها..وقعدت شوية لحد ما خلصت في الجرنال ورجعت تاني انا وزميلي في الجرنال ..

نزلت التحرير لقيت الجيش منتشر وقافل كل مداخل الميدان بس كان بيسيب الناس تعدي ولقيتهم مسكوا واحد ضربوه وأخدوا منه الميموري عشان كان بيصور وحذروا من اللي يصور انه هايترفع..

مشيت شوية عند الصينية لقيت ناس قاعدة وكل اللي كان بيشكك في اللي ماتوا كنت بوريله الفيديو اللي معايا كان بيكتم علي طول.

الشرطة العسطري جريت ورانا ورجعت تاني . وجريت ورانا تاني ورجعت لحد ما سمعت هتافات مش عارف هي إيه بالظبط .. روحت ناحية الهتافات دي لقيت الجيش قافل عليهم وسمعتهم بيقولوا : الجيش والشعب إيد واحدة ، يا مسيحي انت فين الإسلام أهو ، وكمان هتفوا إسلامية إسلامية.

عملت نفسي معاهم لحد ما اشوف ايه الحوار لقيت الجيش شابهم يعدوا للميدان وبابص لقيت عيل صغير عدي عليا وقاللي انت مسلم ولا مسيحي وشاف إيديا كان بيبص علي صليب ولما عرف اني مسلم قاللي ماشي هاسيبك.

شوية والجيش سكت وماكلمش الناس دي ولا فتح بفه معاهم وبعدين حصل اشتباكات وكنت انا في الصينية مع صاحبي كلمت الناس باقولهم ما ينفعش نخبط في بعضنا والأقباط من حقهم الي بيعملوه ، لقيت الكل عليا وواحد قعد يقوللي ماكيل نبيل ومش عارف مين ، قولتله مايكل نبيل صاحبي علي فكرة ومش مسيحي ، وقعدت افهمهم بس للأسف صوتهم كان عالي وفجأة لقيت واحد تخين كده دخل عليا وضربني بوكس وبيقول عليا مسيحي وكان هايضربني لولا ما واحد قاله اني مسلم مع إني رفضت أور حد البطاقة ورفضت أخلي حد يشوف إيدي ..

المهمه اتكلمت مع الناس شوية لحد ما الجيش كان بيخلي الصينية وتقريبا أقنعت واحد ان اللي بيحصل ده ما ينفعش .

المسيرة المؤيدة دي كان فيها إسلاميين كتير وكان فيها ناس شكلها مريب جدا جدا وكنت هانضرب وصاحبي في الجرنال الشرطة أخدته لما اعترض الواد اللي كان عايز يضربني .. وقالوله سيبك من الناس دي دولا منافقين …

ملحوظات

ماسمعتش أي حد مسيحي بيقول كلمة مسلم ومسيحي دي وانا هناك غير ست بتقول لو المسلمين رجالة ينشروا الحاجات تي ، قولتلها انا مسلم والكلام ده هايتنشر في البديل حالا .

التليفزيون المصري دعا الناس للنزول عشاي يغطي علي اللي حصل وكان بيكدب كدب الإبل وما شوفتش ولا واحد مصاب من الشرطة ولا الجيش وما شوفتش أي أسلحة مع المتظاهرين خالص ، وكلهم تقريبا كان باين عليهم الإحترام..

ده اللي أنا شوفته وفيه ناس هاتقول انها من جانب واحد بس أنا ما شوفتس حاجة تانية غير كده ولو شفت كنت هاقول بكل حييادية

شهادتي خلصت وأرجو انها تكون وضحت بعض النقص في الرؤية عند الناس

أحمد مصطفي

صحفي تحت التدريب بالبديل الإليكتروني

مدوّن وناشط سياسي وعضو إئتلاف الإعلاميين

عضو ب 6 إبريل الجبهة الديمقراطية

10أكتوبر

1:56 am

نشر يوم 10 أكتوبر الساعة 02:00 بعد منتصف الليل كنوت على صفحته على فيس بوك بعنوان “شهادتي علي اللي حصل النهاردة عند ماسبيرو من 7 ل 12 بالليل”.

اكتب تعليقُا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: