Skip to content

شهادة أحمد مجدي

Ahmed Magdy’s Testimony in English

فى البداية كان نفسى اوصف مدى الحزن اللى انا فيه دلوقتى قبل ما اتكلم علشان انا شوفت كمية عنف وحقد النهاردة تكفى انها تدمر العالم وشوفت كمية خداع وكدب وتضليل من البتاع اللى اسمه التلفزيون المصرى تكفى تجيب شلل رباعى لجميع المصريين

بعيداً عن حالتى النفسية ومدى حزنى عايز اقول شهادتى علشان اريح ضميرى وبصراحة دى كانت فكرة صديقى احمد مصطفى هو اللى قال لازم كلنا نقول اللى شوفناه النهاردة ونكتب شهادتنا

– كنت فى الجرنال ومخلص شغل وممكن امشى لكن فى حاجه كانت مخليانى قاعد اعمل اى حاجه كده وكأنى حاسس ان حاجه هتحصل ولازم اعرفها وفعلا سمعت ان فى مسيرة كبيرة جدا جايه من دوران شبرا على ماسبيرو وكتبنا خبر عنها وبعدين بصراحة مجاش فى بالى خالص ان يكون فى اى حاجه هتحصل غير شوية ناس ممكن تشتم وتقول عجلة الانتاج والكلام الحمضان ده لكن توصل لقتل ودهس وغاز والكلام ده كله مكنتش متوقعه خالص اول ما سمعت ان فى ضرب نار من البلطجية على المسيرة مصدقتش وقولت اكيد خبر فشنك وبعدها بقى لقيت الدنيا اتقلبت وحد اتصل قاللى هات التلفزيون المصرى المتظاهرين بيولعوا فى ماسبيرو محدش يتصور كنت فرحان قد ايه لأن ماسبيرو ده عايز يولع 20 مرة ورا بعض واحتمال برضه يفضل المبنى الرسمى للغش والتضليل وهو محروق لكن لما جبت التلفزيون لقنا عربيات مولعة وفروع شجر وحاجات كده بس والكلام ده بعيد عن ماسبيرو شوية فقررت انزل بقى واخد الكاميرا واصور اللى بيحصل اول ما وصلت بالمترو مشيت لغايه ميدان عبد المنعم رياض شميت ريحة القنابل المسيلة للدموع على خفيف فضلت اقرب علشان اصور حاجه كده كانت مولعه وفجأة لقيت قنبلة قريبة منى جدا وتعبت جدا وجالى حالة اختناق تعبتنى جدا لدرجة انى قعدت فى الارض مقدرتش حتى اجرى لكن الناس قومونى وجريوا بيا بعيد وغسلولى وشى بيبيسى ومسابونيش غير لما بقيت كويس

وبعد كده بقى فضلت احاول اروح من اى حته تانى يكون ريحة الغاز قليلة فيها مش لاقى طلعت فوق كوبرى اكتوبر قولت اشوف من فوق لقيت عساكر امن مركزى فوق الكوبرى وبيحدفوا طوب على المتظاهرين ومعاهم ناس كتير لابسين مدنى وفى ايدهم شوم وعصيان وبيحدفوا طوب برضه

وانا فوق الكوبرى كنت شايف بقى الامن المركزى لما كان بيمسك واحد واقع ولا حاجه بيحصل فيه ايه اقسم بالله العظيم كانوا بيدوسوا بالبيادات على وشوش الناس والمدنيين اللى معاهم بيسحلوه ويشوطوا فى دماغه زى الكورة بالظبط ويضربوه فى كل الاتجاهات لغاية ما يفقد الوعى يبدأوا يفكروه اذا كان هيسيبوه ولا لا طبعا مقدرتش اصور علشان كان من فوق الكوبرى والمشهد بعيد والاضاءة بتاعته مش هتساعدنى فى التصوير وكمان انا كنت واقف لوحدى قريب منهم كان ممكن لو شافونى بصور يقفشونى نزلت من على الكوبرى وروحت فى صفوف المتظاهرين اللى كانوا اصلا جايين بالمسيرة اشوف النقاشات بتدور ازاى والكلام اللى بيتقال واصور بصيت لقيتهم شباب كلهم وشهم مألوف وانا عارف منهم ناس كتير شوفت نوارة نجم وشوفت علا عبد الفتاح الكاتب الصحفى فى الشروق وشوفت رامى عصام المطرب وقابلت ناس اصحابى وبنات كتير واتأكدت انهم ناس متحضرين وسلميين ومشوفتش اى سلاح ولا حاجه غير ممكن تلاقى واحد ماسك عصاية كده كاسرها من شجرة او طوبة بيدافع بيها عن نفسه غير كده اقسم بالله ما كان فيه اى اسلحه شوفتها وكمان الهتافات كلها اللى سمعتها كانت ” مسلم مسيحى .. ايد واحدة ” و ” يسقط يسقط حكم العسكر ” وحاجات من دى بدون اى تعصب دينى او اهانة لحد

صورت فيديوهات كتير هحط فى الاخر اللينكات بتاعتهم وحضرت عمليات الكر والفر اللى بتحصل وحاولت اقنع الناس نروح الميدان احسن من الكماشه اللى ممكن تتقفل علينا محدش سمعلى وشوية كده وفجأة كل اللى كانوا بيهاجموا المتظاهرين اختفوا والطريق اتفتح وطبعا اول حاجه حصلت المسيرة مشيت لغاية ماسبيرو اول ما وصلنا هناك لقينا فجأة كده الشرطة العسكرية بعد ما كانت واقفه وساكته جريت علينا وضرب بالشوم فى اى حد واقف وبعد ما جرينا كلنا وقفنا ناحية موقف عبد المنعم رياض فهمت اللى حصل وليه البلطجية اختفوا وخلونا نعمل المسيرة الصغيرة دى لغايه ما سبيرو خطة الجيش الى عملها علينا علشان يعمل كماشة ويروح هو يقفل ميدان التحرير ويحاوطنا من جميع الاتجاهات وفعلا ده اللى حصل اى حد رجع ناجية ميدان التحرير كده من مدخل عبد المنعم رياض اتفرم شوفت كتير من المصابين النهاردة ما بين اصابات كبيرة وصغيرة لكن بأمانة مكنتش اعرف ان فيه ناس اتقتلت وادهست والكلام ده كله غير كنت بسمع من الناس ان فى عربية دهست ناس ومكنتش بصدق بحسبهم بيهولوا وبيقولوا اى كلام وخلاص ولما رجعت الشغل تانى علشان اسلم الفيديوهات وشوفت صور الناس اللى مقتولة والناس اللى متداس على وشوشهم وعرفت ان رفيق اسمه مينا دانيال من حزب التحالف توفى بجد جالى اكتئاب وحالتى النفسية وحشة جدا وحاسس بالزنب جدا شوفوا الفيديوهات اللى صورتها النهاردة

ـــــــــــــــــــــــــــــــــــــــــــــــــــــــــــــــــــــــــــــــــــ

اشعال الحرائق فى ميدان عبد المنعم رياض

http://www.youtube.com/watch?v=nQCRlA-Kq-E

ـــــــــــــــــــــــــــــــــــــــــــــــــــــــــــــــــــــــــــــــــــــ

المطرب رامى عصام يطارد البلطجية على كوبرى اكتوبر

http://www.youtube.com/watch?v=sybiNW6FYMo

ــــــــــــــــــــــــــــــــــــــــــــــــــــــــــــــــــــــــــــــــــــــ

اشتباكات وقنابل مسيلة للدموع بميدان عبد المنعم رياض

http://www.youtube.com/watch?v=3EylEvZNnMY

ــــــــــــــــــــــــــــــــــــــــــــــــــــــــــــــــــــــــــــــــــــــــ

احمد مجدى

صحفى بجريدة ميدان التحرير

عضو باتحاد الشباب الاشتراكى

مصرى :(

نشرت يوم 10 أكتوبر الساعة 03:56 فجراً على صفحة الشاهد على فيسبوك بعنوان “شهادتى عن احداث اليوم”.

اكتب تعليقُا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: