Skip to content

شهادة أحمد إبراهيم

Ahmad Ibrahim’s testimony in English

كنت متابع تحركات المسيرة من لبني درويش علي تويتر و قلت انضم ليها عند ماسبيرو علي طول لاني كنت جي من مدينة نصر و لاني برضة مكنتش متوقع حاجة زي كدة بس انا كنت طالع في المسيرة علشان الشاب رائ اللي اتسحل من الشرطة في فض الاعتصام يوم الاربعاء الماضي

اتحركت ووصلت الي ميدان رمسيس حوالي الساعة 6و كان الطريق مقفول بعربيات الامن المركزي و ضباط الداخلية والعربيات كلها بتلف نزلت و قلت اكمل علي رجلي لغاية ماسبيرو و انا ماشي في شارع الجلاء ناس في تجمعات واقفة و بيقولو في مسيحين بيموتوا عند ماسبيرو بس مقدرتش اعرف اية اللي بيحصل بالضبط و كنت عمال اكلم الفريد رءوف و لبني و ناس تانية هناك و محدش بيرد خالص

لاحظت ملاحظة في وضوح الشمس انة الشارع في مخبرين كتبر اوي من قبل جرنال الاهرام ..توترت جدا وو ابتديت اجري و انا معدي شوفت واحد واخد رصاصة في رجلة عند مستشفي الجلاء و الناس شايلة بس مكنتش عارف حي و لامطاطي

عند محطة الاسعاف ابتديت اشوف ناس مرعوبة بجد و كلة عمال بيوقلي متروحش هناك في دم كتير و ناس بتعيط اوي و لقيت واحدة قعدة امام القنصلية الايطالية في الاسعاف بتعيت ع الرصيف وعمالة تقول هما بيعملو فينا كدة لية حاولت افهم منها اية اللي حصل كل اللي قالتة ليا اوعي يبني تروح هناك قولتلها انا مسلم و لازم اروح اقف مع اخواتي و صحابي هناك قالتلي و حياة المسيح و العدرا ما تروح طبطبت عليها و كملت

حكايات المدرعة اللي دهست الناس الكل كان بيرويها بدون اي اختلاف في التفاصيل

عند الشارع االي قبل الهيلتون شوفت شوية شباب واقفين بشوم بس بيتفرجوا علي الناس و هي جاية من ماسبيرو

عند المنطقة دي في فوضي عارمة ناس بتجري بناس مصابة و ناس بتصوت و ناس واقفة بعربياتعا من فوق الكوبري ..قلت اخش من شارع رمسيس هيلتون نفسة لانو كان قدامي ناحية الكورنيش و في طلعة اكتوبر من عبد المنعم رياض كان في معرك كتيرة و شايف دخان من هناك و عسكر الامن المركزي بيتحركوا من فوق

اخر الشارع بتاع رمسيس هيلتون الشارع في اخرة كان مقفوول خاص و في ضرب نار حي من عند ماسبيرو الشارع دة كلة محلات اصلا و الناس المصابة بيحاولوا بدخلوهم جوة و في ناس بتساعدهم ….واحدة مسكت فيا و كانت بتدور علي ابنها و مكنتش عارف اعمل اية و شوفت واحد قدامي بحوالي 5 متر وقع فجأة و روحنا علية لقيناة بينزف من فخدة بعد سماع رصاص جاي من اخر عمارة جنب ماسبيرو شيلناة و اناس ورايا بتشيل مصابين و انا شوفت واحد بيضرب رصاص من المبني اللي في اول الشارع الطويل اللي جنب ماسبيرو و كان ضابط داخلية و كان في عربية اسعاف في اخر الشارع امام الفندق الناحية التانية الاسعاف مكنتش عايزة تاخد و بعد خناقات عبثية اخدتة و ناس ركبت معاة و مظهرش عربيات اسعاف تاني خالص

حتي الان حوالي الساعة السابعة كانت الشرطة العسكرية هي المتصدرة المشهد بأكملة و مكنش في اي قنابل او بلطجية

قابلت نوارة نجم عند محل العصير اللي قدام الفندق و الناس كانت اتلمت عليها في الوقت دة الشباب بتوع حركة المصري الحر ابتدوا يجهزوا لعيادة ميدانية عند مكتب الجونة و روحنا جبنا الادوات من صيدلية في الشارع نفسة و فضلت اوجة الناس و ابلغ بمكان العيادة و اللي كان بيقدر يساعد بيساعد

سبتهم شوية و روحت انا و نوارة في اتجاة الكورنيش ووصلنا قدام راديو شاك كدة و شوفنا المدرعة المحروقة و فوي و صوت طلقات رصاص حي و اثار دم مغرق المكان في اللحظة دي ابتدا ضرب القنابل المسيلة للدموع وجرينا شوية كدة لحد باب الهيلتون اللي جنب راديو شاك ابتدا معدل القنابل يزيد و مداها بيوصل لحد ميدان عبد المنعم رياض جرينا تاني من الغاز لحد اول الموقف كدة و هنا بقي الامن المركزي ابتدا يطلع من تحت لفوق عند الكوبري و ابتدا الضرب يوصل لغاية عبد المنعم رياض و الامن المركزي بيرمي طوب و شوفت في الحتة دي رشا عزب و عزة شعبان و لينا مجاهد و كانوا مخنوقين من الغاز جرينا شوية كمان لغاية بعد مكتب الجونة و ابتدت الناس تكسر الرصيف و تشيل طوب و ترمي علي الامن المركزي الي عايز ينول من نزلة الكوبري و وراة بلطجية ظهروا كدة علي الساعة الثامنة و في نفس الوقت مظاهرة اتجمعت و بتهتف ضد المشير و مسلم و مسيحي ايد واحدة و شيخ اتشال و شايل صليب و الناس بتهتف ضد المجلس و المشير و برضة ناس جاية من شارع الهيلتون بيهتفوا

استمر الضرب بالطوب و الغاز في المنطقة دي حوالي نصف ساعة و لاحظت اني مدي قنابل الغاز بيوصل من الكورنيش للميدان نفسة و الناس مخنوقة من الغاز و شوفنا ان في شوية عساكر جيش في منطقة اللي تحت كوبي اكتوبر عند موقف عبد المنعم رياض و مش عارفين هما هييجوا يضربونا و لا هيقفلوا الطريق ويعملوا كردون و لااية

لغاية الوقت دة اللي هو حوالي 8 و نصف كان واضح احنا مين مكنش في تصرفات غريبة و من الوقت دة الجيش تقريبا اختفي من المحيط دة و الامن المركزي تصدر المشهد

تحت ازدياد وطأة الضرب تقهقرنا ورا كمان و شوفنا في اللحظة دي البلطجية طلاعين من الشوارع الجانبية و معاهم اسلحة و مطاوي

و ابتدا ضرب المطاطي من بعيد و اخدت انا و صاحبة نوارة نجم خرزتين في دراعنا بس بسبب بعد المسافة لن نصاب

و المعركة كلها بقت في الوقت دة من البلطجية ومن وراهم الامن المركزي و احنا علي طلعة كوبري اكتوبر من الميدان تقههرنا من الغاز تاني و تالت و رجعنا في اتجاة شارع الجلاء

وقفنا شوية بعد الموقف و في واحد صعيدي كدة جة وورانا انا و نوارة فيديو للجثث ملقية في مدخل العمارة اللي جنب ماسبيرو و كانت كلها مشوهة تماما و واحد صحفي وراني المدرعة وهي بتدوس الاقباط

ملاحظة هنا مهمة اوي مفيش حد خالص كان بيقوول لغاية دلوقتي انو في اقباط بيموتا حد من الجيش و الكلام دة حولينا خالص

ابتدا هنا البلطجية يلوحنا من بعيد بأننا نمشي و ابتدا رمي الطوب منهم و من فوق الكوبري كمان و جريت انا و نوارة و الناس تحت الكوبري احتماءا من الطوب اللي جي من فوق و البلطجية بيجروا ورانا لغاية ما وصلنا للاسعاف

هنا يقي وقنا و اجهنا اليلطجية بالطوب و كنت انا و ناس بنهاجمهم من شارع بولاق بزجاجات و طوب و في مجموعة تانية بتتضرب و وصلت لحد مستشفي الجلاء و تقريبا مانت نورة معاهم لاني سبتعا تحت الكوبري عند القنصلية و انا منت بجيب الطوب من الشارع لقيت ناس بتقول انو الاقباط بيموتوا الجيش بس مكنش حد فيهم شايل سلاح و لا حاجة و كانوا بيتفرجوا علي المعركة و البائعين و المكروباصات في الشارع مشيوا و اليلطجية دخلوا ورانا شارع بولاق حصل كر و فر ما بينا و دخلنا الشارع اللي جنب مبني الكهرباء و خرمنا كدة و طلعنا عند مستشفي الجلاء و لبلطجية مكملوش ورانا

وقفت عند كشك علشان كنت واخد طوبة و جبت مية و هنا ابتدت ناس تكلمني علي اننا نذهب للتحرير بس مكنتش عارف اروح و لا ارجع لاني البلطجية اختفوا فجأة و كانت حوالي الساعة 9 كدة قررت اني اروح اشوف اية االي بيحصل عند ماسبيرو

كلمت علاء سيف لاني عرفت انو اتصاب في بطنة و قالي انو عند ماسبيرو و كان صوتة ضايع قولت لازم اروح اشوف فية اية

هنا بقي قبل عبد المنعم رياض لقيت شوية بلطجية و واحد بجلابية وموقفين عربية سيت و بيضوبوا واحد علشان مسيحي و الناحية التانية البطجية قافلين الملف اللي بيدودي علس شارع نقابة الصحفيين الهم كملت و في الطريق مكنش في غاز تاني و الامن الامركزي اختفي

قابلت علاء عند ماسبيرو و ليليان وجدي ووقفنا شوية مع شوية مشاحنات من مواطنين شرفاء و واحد جة يسألنا هو انتوا 6 ابريل

في تلت عربيات امن مركزي ظهروا عند الهيلتون ناحية ماسبيرو بس مكنش فيهم جنود و افتكرنا انهم هييجوا يدوسونا بس كملنا و روحنا ناحية التحرير لقينا الشرطة العسكرية قافلة مخل التحرير من عند المتحف و شوية ناس واقفين بيهتفوا الشعب يريد و تطبيق شرع اللة و الجيش بيتفرج عليهم

كمية قلق و ثوتر غير طبيعي و ناس تيجي تقولنا امشوا من هنا

لفينا و رجعنا ناحية شارع الاسعاف و قررنا اننا نخش وسط البلد بعد ما عرفنا اننا مش نعرف نخش التحرير من هناك و مشينا في شارع النقابة الشوارع كانت اشبة بيوم 26 و 27 يناير مفيش عربيات و ناش واقفة قاقلة الشوارع و خاصة شارع معروف

بعد وصلنا قرب طلعت حرب كدة اتفقنا علي اننا نتفرق سبت علاء و اختة و مشيت انا و الفريد رءوف و بجد حسيت بالمرارة اكتر من الالم و التعب لما الفريد قالي دي في واحدة محجية نمشي وراها علشان كنا خايفين حد يطلع علينا

روحنا ع الزملك و في الطريق كان في انتشار للبلطجية و لفينا بالتاكسي من شارع السبتية و دخلنا شارع بولاق مرورا بكوبري 15 مايو ثم الزمالك اخيرا

لغاية هنا شهادتي علي احداث ماسبيرو بعد ما روحت علشان اغير كلمتني نوارة و قالتي انهم محتاجين دم في المستشفي

القبطي و اسف هكمل احداث شارع رمسيس و المستشفي القبطي في نوت تاني علشان عايو افصل الشهادتين عن بعض

و حياة دمك يا شهيد دمك حقي و مش هسيبة


نشرت يوم 12 أكتوبر الساعة 00:31 بعد منتصف الليل على صفحة الشاهد على فيسبوك بعنوان “شهادتي علي احداث ماسبيرو-9 اكتوير”.

Advertisements
اكتب تعليقُا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: